Showing posts with label Thai Movie. Show all posts
Showing posts with label Thai Movie. Show all posts

Thursday, August 9, 2012

Wanting to Suck Seed




The poster caught my attention and because I love music I find myself searching youtube for this film. Masuwerte namang natagpuan ko ito at napanood ng buong-buo. 



Nagsimula ito noong bata pa si Ped na nagkaroon ng paghanga kay Ern. Ito kasi ang nagpakilala sa kanya ng rock music. Pinahiram siya nito ng cassette tape kung saan naka-record ang mga ganoong genre ng kanta. Sinubukan niya itong kantahin gamit ang gitarang hiniram sa matalik niyang kaibigan na si Khung at ni-record ang pagkanta niya. Binalak niyang ibigay it okay Ern kaya lang hindi siya nagkaroon ng pagkakataong maibigay ito hanggang makaalis na ito papuntang Bangkok.


Hayskul na sila nang bumalik at magkita ulit ni Ern. Nanumbalik ulit ang paghanga niya dito. Samantala, ang kanyang bespren na si Khung ay nagplanong bumuo ng isang banda para kalabanin ang grupo ng kakambal niyang si Kae at para mapansin ng mga girls.

Khung
Ped
Ex
Ern
Si Khung (Pachara Chirathivat) ang vocalist, si Ped (Jirayu La-ongmanee) ang bass guitar at si Ex (Thawat Pornrattanaprasert) ang drummer. Sa huli, nakasama sa kanila si Ern (Nattasha Nauljam) na mahusay palang maggitara.  Sa kagustuhan ni Khung na maipakita sa kakambal niyang si Kae na magtatagumpay sila, ibinalita niya na sasali sila sa Hot Wave Music Awards, isa itong sikat at kilalang band competition sa Thailand.


Lagi silang magkakasama bilang isang grupo at dahil dito sinabi ni Khung kay Ped na may gusto siya kay Ern. At dito pumasok ang conflict sa pagitan ni Ped at Khung. Habang si Ern naman ay may gusto rin kay Ped.


Isa na naman itong Thai Film na talaga naman bumuhay sa alaala ng aking kabataan. Parang ipapaalala nito ang isang bahagi ng buhay mo noong kabataan kung saan naghahanap tayo ng mga taong tatanggap sa atin, magkakaroon ng mga crushes at first love at higit sa lahat pagkakaroon ng kagustuhang maabot ang pangarap para may mapatunayan.

Nakakatuwa ang kabuuan ng pelikula at ang mga artistang gumanap. Mas naging maganda pa ito dahil hinaluan ng mga musika ng mga sikat na banda at kahit pa nga iba ang salita nila, ang ganda ng melody at meaning ng mga kanta na ini-relate sa mga eksena ng bawat tauhan.


Ang title din ng pelikulang ito eh, nakaka-intriga… Suck Seed (Succeed). Si Khung ang nakaisip ng pangalan na ito ng kanilang banda. Ito ang panahon na nabusted siya ni Ern at si Ex naman ay ipinagpalit ng gusto niyang babae sa isang tibo. Habang si Ped ay nasa gitna ng pag-iisip kung sino ang pipiliin ang kaibigan o si Ern.


Ang simple ng story pero madadala ka ng mga eksena sa mga tawanan at maging sa mga medyo malungkot na part. Well, naiyak din ako sa movie na ito. Para kasing magkakaroon ng flashback sa memory mo ang high school life.

Bagay na bagay ito sa mga kabataan, sa mga isip bata, mahilig sa music at sa mga gustong makapanood ng kakaibang kuwento ng pagkakaibigan. Isa itong panalong sound trip!

Hindi ito mabubuo kung wala si Director Chayanop Boonprakob na siya ring utak ng buong pelikula. Ipinalabas ito noong nakaraang taon (March 17, 2011). Sa laki ng kinita ng pelikulang ito, patunay lang na maganda ang story. (*^_^)

Pahabol ... eto ang Trailer


eto ang may trailer na may subtitle... enjoy!



Friday, April 29, 2011

Say, Hello Stranger!


Have you ever fall in love with a stranger? If yes, siguro ay makakarelate ka sa kuwento ng Hello Stranger, isang Thai film na kinunan ang halos 90% ng movie sa bansang Korea.

I have this eagerness to know film from Thailand because it gives me different taste and Hello Stranger is another great movie I’ve watched. It was released last year 2010 and directed by Banjong Pisanthanakun (siya rin ang director ng Shutter at Alone).

Attracted na ako sa trailer pa lang ng movie na ito at talagang inabangan ko sa youtube…(sa youtube ko lang pinanood dahil hindi naman maipapalabas dito sa atin L).

Tungkol ito sa isang lalaki’t babae na nagpunta sa bansang Korea at doon nagkita at nagkasama sa isang masayang adventure na gusto nilang gawin.

Heartbroken si Lalaki dahil supposed to be kasama niya ang GF niya sa tour pero bigo dahil sa nabalitaan niyang magpapakasal na ito sa iba habang si Babae naman ay nagsinungaling sa kanyang BF na kasama niya ang kanyang bestfriend but later on ay nalaman nito at sila’y nagbreak.

Dahil sa walang kakilala si Lalaki at hindi siya familiar sa lugar kaya bumuntot siya sa babae at nagshare sila ng mga gusto nilang mga gawin at ng kanilang lovelife. And later on, sa kanilang pagbalik sa Thailand ay saka lang nila nalaman ang kanilang mga nararamdaman para sa isa’t isa.

Nakakatuwa ang kabuuang ng pelikula mula sa umpisa hanggang sa katapusan nito. Nandoon ang thrill at excitement kung magkakatuluyan ba sila o hindi…maging ang tunay na pangalan ng mga character ay kaabang-abang ngunit sawi ang manonood na malaman ang real name ng mga bida.

They have this saying “It’s nice not knowing you!” Sabi kasi ng babae mas maganda na hindi nila alam kung anong tunay nilang mga pangalan para di complicated…para kung sakaling nakakahiya ang gawin nila ay hindi nila maipagsasabi sa iba. Kaya gumawa sila ng tawagan ‘Dang’ si lalaki na ginampanan ni Chanthavit Dhanasevi na siya ring bida sa Coming Soon a horror film at ‘May’ naman si babae na ginampanan naman ni Nuengthida Sophon.

Magaling ang naging pag-arte nila at ramdam ko ‘yung enjoyment nilang dalawa habang nilalakbay ang kabuuan ng bansang Korea lalo na ang mga lugar kung saan nag-shoot ng mga Koreanobela.

Nakakatuwa ang part kung saan natulog sila sa isang hotel at naglokohan sila about their lovelife. Kahit ako nakaramdam ng kaba dahil seryoso, iyon naman pala ay isang malaking joke!

Isa sa mga magandang eksena ang ginawa ni Dang para kay May ay isang date kay Bae Yong Joon dahil sa idol niya ito…but wait…noong una akala ko talaga si Yong Joon...  iyon pala..kamukha lang! At ang isa ay nung nasa may skiing sila…gusto ng babae na makakita ng snow at kung nandun na siya ay maghuhubad siya ng naked at si lalaki naman ay kakain ng snow dahil gusto niyang malaman ang lasa nito. It was really funny and sweet!  

Kakabitin nga lang ang katapusan dahil sa hindi malaman kung nagkita ba talaga sila pagbalik sa Thailand dahil sa favorite radio program lang nalaman ng babae na hindi pala natuloy ang pagpapakasal ni Dang sa GF niya at siya pala ang talagang mahal nito. Hanggang sa huli stranger pa rin ang mga bida sa mga manonood dahil sa hindi man lang nalaman ang real name ng dalawa.

It’s a feel good movie…you'll laugh and cry then you’ll fall in love! (*^_^)











Sunday, March 13, 2011

Bangkok Traffic Love Story

"If we have a boyfriend, but he's never free to eat out with us, never have time to go anywhere with us, so what's the point of having one?"

Simula ng mapanood ko ang Crazy Little Thing Called Love nagkaroon na ako ng interes sa mga Thai Movie. Nagsimula akong mag-search ng mga Thai movie…and the title of this movie caught my attention.

Na-released ito, two years ago by GTH…October 15, 2009 sa Thailand. It was directed by Adirsorn Tresirikasem and the story written by Navapol Thamrongruttanarit.

Isang typical na kwento ang hatid ng movie na ito. Tungkol sa isang 30 yrs. old na girl na si Mei Li (Sirin Horwang) na nakaramdam ng lungkot ng mag-asawa ang kaibigan niyang si Ped. Pressured din siya dahil sa siya na lang ang walang asawa sa kanilang magkakaibigan. Sa Kasal ni Ped, marami siyang nainom na wine kaya ang ending nakatulog siya sa kwarto ng bagong kasal. Nagising siya ng madaling araw ngunit muntik mabangga ang kanyang minamanehong kotse at sumadsad ito sa barrier para matanggal ang side mirror nito. Dito niya nakilala si Loong (Theeradej Wongpuapan) isang engineer na nagta-trabaho sa BTS skytrain.

Sa loob ng 17 years, inisip niya na ang hindi maganda na babae ang gumawa ng first move sa lalaki dahil sa sinabi ng nanay niya noon…pero nalaman n’ya sa kanyang ina na ito pala ang unang gumawa ng paraan para maging malapit sila ng tatay nito. Kaya gumawa siya ng paraan para magkalapit sila ni Loong.

Nakakatuwa ang effort na ginawa ni Mei Li para makasama si Loong kahit magkaiba sila ng oras ng trabaho. Pang-umaga kasi si Mei Li habang panggabi naman si Loong. Ilang gamit ni Loong ang aksidenteng nasira ni Mei Li…una ang sunglasses, laptop at ang digital camera nito. Pero gumawa siya ng paraan para makabawi at naging malapit sila.

Inanyayahan ni Loong si Li na sumama sa Family day ng BTS at doon nalaman ni Li na aalis pala si Loong para mag-aral sa Germany for two years. Gusto sana ni Loong na ipagpatuloy kung anong meron sa kanila kahit malayo siya pero mas pinili ni Li na maging acquaintance na lang sila.

Maganda ang story…magaan sa pakiramdam at talagang nakakatawa ang mga eksena. Maganda rin ang chemistry ng dalawang bida…ramdam ang kilig at saya ng palabas dahil sa kanila. Nakaka-touch sa bandang hulihan kung saan may pinadalang box si Loong kay Li at nakalagay lahat doon ang mga bagay na nag-connect sa kanilang dalawa…side mirror, box ng sunglasses, sirang laptop at digicam. Nagustuhan ko ang naging ending…kahit medyo basa na ng manonood na muli silang magkikita after two years…naging maganda pa rin ang dating ng katapusan.


Sa kabuuan, worth it ang oras ko sa panonood ng pelikulang ito and I really like the idea of movie like this one na kikiligin ka kahit walang kissing scene. Kahit sino pwedeng maka-relate sa kuwento, di lang ito para sa mga babae pwedeng-pwede rin sa mga lalaki.(*^_^)


Monday, January 24, 2011

Crazy Little Thing Called Love (Thai Movie)

Wala akong ine-expect sa movie na ito. May nagsabi kasi na maganda at medyo interesting ang title kaya sinubukan kong i-search sa youtube…hindi ko na pinanood ang trailer... umpisa agad sa simula…para hindi na ako mabitin.

Na-release ito last August 2010 sa Thailand…karaniwan kasi ang alam ko puro horror ang movie sa Thailand kaya parang curious akong malaman kung ano bang meron sa palabas na ito.

Tungkol ito sa first love ni Nam (Pimchanok Lerwisetpibol) isang ordinaryong 14 yrs. old na girl na hindi kagandahan...ugly duckling…kumbaga. May lihim siyang pagtingin kay Chon (Mario Maurer) na sikat sa kanilang school dahil sa gwapo na ay mabait pa. Pinag-aagawan ng mga girls ang atensyon niya at kasama d’on si Nam kahit alam n’ya na wala siyang pag-asa sa dami ng maganda sa school. Pero sa tulong ng kanyang mga mabubuting kaibigan unti-unti siyang nagtransform mula sa ugly duckling to a very pretty girl…as in.

Simple lang ang takbo ng story pero mararamdaman ng manonood ang emotion…lalo na ‘yung kilig. Gusto ko ‘yung positive vibe ng movie dahil naging inspirasyon ni Nam si Chon para i-improve ang sarili at pataasin ang grades n’ya.

Nakakatuwa ang mga bonding moments ni Nam at ng mga kaibigan n’ya. Nakakakilig naman ang moments nila ni Chon pero nakakaiyak ang separation nilang dalawa sa bandang huli.

Sa trailer sinabi na...it’s everyone’s story and I agree with that. It brings back memories of high school days, first crush and first love…dito kasi nangyayari ang mga bagay na kapag binalikan natin sa ngayon eh, tinatawanan na lang natin. Iyong simpleng paghanap ng paraan para makita ang crush o kaya mapalapit dito.

Sa movie, nakakatuwa ‘yung part na nagpaalam si Nam na pupunta ng CR pero ang totoo ay gusto niyang sumilay kay Chon na ang room ay nasa third floor. Maging ung pag-extra niya sa pagkuha ng picture ni Chon sa isang classmate nila na maganda.

Maganda ang kabuuan ng pelikula kaya nga lang medyo bitin ang ending at siguro nga tulad ng ilang mga sinasabi ng mga nakapanood na nito…sana may part 2. Isa na naman ito sa mga napanood ko na walang kissing scene pero ramdam ko ang saya, sakit at kilig na dulot ng first love sa movie.

Sa tingin ko, madadagdag ang mga Thai Movie na tulad nito sa mga aabangan at panonoorin ko sa future dahil na-enjoy ko ng bongga ang pelikulang ito. (*^_^)


Pahabol lang...sa picture na ito ni Pimchanok Lerwisetpibol kahawig niya si Kim Chui. :))